Dangos 31 canlyniad

Mae'r ffeil yn cynnwys agendau a chofnodion Pwyllgor Rheoli Cronfa Apêl J. Saunders Lewis o'r cyfarfod cyntaf ar 3 Fehefin 1989 hyd 30 Ebrill 1994, a chopi o gofnodion yr unfed gyfarfod ar bymtheg ar 17 Tachwedd 2001; ynghyd â chyfrol o gofnodion Pwyllgor Sir Gaernarfon o'r Gronfa, o'r cyfarfod cyntaf ar 10 Mai 1992 hyd at y pedwerydd cyfarfod ar ddeg ar 2 Gorffennaf 1995.

Mae'r gyfres yn cynnwys copi o gyfansoddiad y Gronfa, wedi ei dyddio 18 Medi 1989, a chopi o ddiweddariad, 1 Mehefin 1999.

Mae'r ffeil yn cynnwys cyfrifon a mantolenni ariannol, a manylion am fuddsoddiadau'r gronfa ganolog, 1989-2000.

Mae'r ffeil yn cynnwys cylchlythyrau Cronfa Goffa Saunders Lewis yn bennaf, gyda newyddion ynglŷn â gweithgareddau'r Pwyllgorau Sirol i gasglu arian at y Gronfa, hysbysebion am yr Ysgoloriaeth, torion papur a llythyron ynglŷn ag amodau ceisiadau am yr Ysgoloriaeth.

Mae'r gyfres yn cynnwys deunydd printiedig, 1996-2002, y cyfan yn ymwneud â ffyrdd y gall elusennau godi elw, a chyfrifoldebau ymddiriedolwyr elusennau.

Mae'r ffeil yn cynnwys rhestr y Comisiwn Elusennau o enwau a chyfeiriadau elusennau yng Nghymru, 1992.

Mae'r ffeil yn cynnwys papurau Eirug Wyn, Trysorydd Pwyllgor Sir Gaernarfon o Gronfa Goffa Saunders Lewis, 1992-1995, yn ohebiaeth, mantolenni ariannol ac adroddiadau ar sefyllfa ariannol cronfa'r Pwyllgor Sir.

Mae'r gyfres yn cynnwys gohebiaeth yn ymwneud â'r Apêl, megis llythyron cyffredinol ynglŷn â sefydlu Pwyllgor Rheoli'r Gronfa Goffa; llythyron Pwyllgor Sir Gaernarfon; gohebiaeth y Pwyllgorau ac Isbwyllgorau; llythyron yn ymwneud â threfnu gweithgareddau amrywiol i ddwyn arian i'r gronfa gan gynnwys gohebiaeth â'r noddwyr; papurau yn ymwneud â lansio'r Apêl; a datganiadau i'r wasg er mwyn hysbysebu'r Apêl.

Mae'r ffeil yn cynnwys rhestr o noddwyr, 1989-1990, a pheth gohebiaeth.

Mae'r ffeil yn cynnwys gohebiaeth gyffredinol, 1989-2002, Pwyllgor Rheoli Cronfa Goffa J. Saunders Lewis, ynghyd â'r llythyr gwreiddiol, dyddiedig 28 Mai 1986, at Mrs Mair Jones, merch Saunders Lewis, yn trafod y bwriad o godi cronfa genedlaethol er mwyn sefydlu Ysgoloriaeth i goffáu ei thad.

Mae'r ffeil yn cynnwys llythyron, 1991, yn ymwneud â chyhoeddi llyfryn dwyieithog ar Saunders Lewis, a chopïau o erthyglau arno a wnaed gan Branwen Jarvis a John Rowlands.

Mae'r ffeil yn cynnwys papurau, y mwyafrif yn lythyron, a hefyd cofnodion pwyllgor a phapurau amrywiol eraill, 1992-1994, Cangen Sir Gaernarfon o Gronfa Goffa Saunders Lewis. Sefydlwyd y gangen yn sgil y cais a gafwyd gan Bwyllgor Rheoli Canolog y gronfa am gefnogaeth gan bwyllgorau sirol i gasglu arian tuag at yr apêl.

Mae'r ffeil yn cynnwys llythyron yn ymwneud â chyflwyno rhaglen deyrnged i Saunders Lewis yn y Babell Lên yn Eisteddfod Llanelwedd, 1993, ynghyd â chopi o ddarlith gan Emyr Humphreys yn dwyn y teitl Theatr Saunders Lewis a gyhoeddwyd gan Cymdeithas Theatr Cymru, 1979.

Mae'r ffeil yn cynnwys gohebiaeth y Trysorydd, Alun Creunant Davies â Dr Meredydd Evans, Ysgrifennydd, y ddau yn swyddogion Cronfa Goffa Saunders Lewis, ynglŷn â sefyllfa ariannol y gronfa ganolog, 1990-1994.

Mae'r amlen yn cynnwys llythyron, 1991, yn ymwneud â chyngerdd teyrnged a drefnwyd gan Gôr Americanaidd i Dr George Guest ar ei ymddeoliad fel Corfeistr Coleg Sant Ioan, Caergrawnt. Derbyniodd Cronfa Goffa Saunders Lewis swm sylweddol o arian o ganlyniad i'r cyngerdd ar ôl i Dr Guest enwebu elusen o'i ddewis i dderbyn elw'r noson.